قصائد و اشعار الأمير خالد الفيصل

أعظم الحب في اتفاق السجايا
وأبرّ الوفاء ما هـو مطلـب
كلما لاح فيصل في خيالـي
وانتخيت يـا لـك مـن أب
لاح سلطان في صميم حياتي
وأراني أبي وجاء بأعجـب

يوم انا طالب هقيت اني عرفـت

كل مافي الكون من سـر الحيـاه
يوم انا طالب تحمّسـت ووعـدت

اني اصلح ما تبيّـن لـي خطـاه
يوم انا طالب على الغيمه رسَمت

ضحكة الدنيا على عـذب الشفـاه
يوم أنا طالـب تخيّلـت وحَلمـت

اني البس من هَدب شمسي عبـاه
يوم انا طالب حَسبت اني وصلت

اثرني ما دست بالرجـل الوطـاه
وانتهى ربيع الاحـلام وظهـرت

اصدم الواقع ويصدمنـى عطـاه
ينجرح شوف العيون الى التفـت

كن في حجر العيون اكبـر قـذاه
ان بغيت امشي لقيت انّي وقفـت

وان رفعت الصوت ما جاني صداه
الحقايـق فاجأتنـي مـا بــدأت

والزمان اسرع من اللي في رجاه
وانكسر غصن الخيال اللي زرعت

والتوى صدري علـى تسعيـن اه
لكن اني رغم هذا مـا انهزمـت

واستمريت ادعس الشـوك بحفـاه
كلمـا زادت مواجيعـي صبـرت

بين ثلج وبين جمـرات الغضـاه
ما غلبت الوقت لكن مـا انغلبـت

اعتصر نبعي من بطون الصفـاه
كلها لعيون معشـوق(ن) عشقـت

ديرتـي ديـرة رفيعيـن الجبـاه
في ثراها غالـي احبابـي دفنـت

وفي سماها اجمع الحلـم وهـواه

مرت الستيـن والشايـب طفـل
توي أدرس في كتاتيـب الحيـاه
مرت الستيـن مـازال الجهـل
كل ما جيت استره يكشف غطـاه
مرت الستين فكري مـا اشتعـل
كلمااشعل جذوتـه وقتـي طفـاه
مرت الستين دربـي مـا كمـل
واقف في راسـه أتأمـل مـداه
ألتفت والوقـت يدفعنـي عجـل
ماانتهيت من امس وباكر ذا سناه
كل يوم أقـول فـي باكـر أمـل
وان حضر باكر رجيت اللي وراه
أرفع الهقوات لـو حظـي نـزل
واقنص القاع الذي ما احد وطـاه
المراجـل مـا بطلبتهـا خجـل
يخجل اللي يقدر الطيب وعصـاه
السنين اشعـار والشاعـر مثـل
يفهمه من شاف بالعقـل وقـراه
أكتب الايام في شعـري غـزل
كل بيت عاش في عمري حيـاه

توك تجي وش عندنا لك ترتجي

لانا أنا ولا الزمان هو الزمان

ولا المكان هو المكان

ولا القلوب ذيك القلوب

اللي توقد لك شبوب

تقدرتعود ترجع تولّع أو تذوب

توك تجي



فوق الغيوم غابت نجوم

تركت على عمري رسوم

تحكي لطلاب الهوى

قصة نوى

قصة كتبناها سوا

انت بجفا وأنا بعذاب

توك تجي



توك تجي .. لا لا تجي

خلك كذا

خلك شذا من غير زهور

موجه على ظلمة بحور

خلك على مر الزمن لحن وشجن

عشته معاك ساعة هواك

أحسن تروح عني بعيد

أخاف تجيني واجرحك

لا...لا تجي

أنا فيني من الأيام جرحيـن(ن) علـى الخفـاق
من الاقصين جرح وجرح(ن) من ربعي الادنيني

أقوم بجرح لكن ثاني الجرحيـن سـاق وعـاق
مشى سمه مع عرقـي ويبسـت منـه كفّينـي

يولّعني وَهج ناره وفـي فكـري كمـا البـرّاق
عواصيـف(ن) تودّعنـي وعاصـوف يلاقينـي

مثل ريشه نقلها ريح مع شوك وفـي مضيـاق
يمـزع شوكهـا جنبـي وبالرجليـن يدمينـي

ألَمها جضّ به قلبي ودخّـن بالصّـدر حـرّاق
تفجّر كنّه البركان فـي سمعـي وفـي عينـي

يعاقبني زماني يوم صدري بالعنـا مـا ضـاق
أشيل الحمل ما تَعبت من الوعـرات رجلينـي

أعرف أنه قدر عمري واعرف أن الزمن سرّاق
وهذا ما كتبـه الله وأنـا المكتـوب يرضينـي

تعبـت عيونـي بـس أدور واراعـي
و أنشد عن الزينات واشتاق واشـوف
لاشك مـا قـد تـاه فكـري وضـاعِ
ألين شفتك و أصبح القلـب مشعـوف
اللي داعاني لك مـن الحـب داعـي
داعـي غـرام للمحبيـن مـعـروف
ملكتنـي يــا بوعـيـون وســاعِ
أسيـر حبـك بيـن أياديـك مكتـوف
ليتـك تخفـف مـن عظيـم التياعـي
لو تبتسم لي شفتهـا منـك معـروف
متى يصيـر بنـور عينـي اجتماعـي
و ألقى التّعب من سيد الأحباب مخلوف

يمـرّنـي كـــل عـــام يـــوم مـيــلادي
يـوم أعـرفـه ويــوم انـسـى مواعـيـده
يـمـرّنـي وانـتـبـه لـلـغـايـب الــبــادي
واهوجـس بحـال غيـري مـن مواليـده
أرتاع وارتـاح لـه .. يفـرق وهـو عـادي
ينقص من العمر عام في ضحى عيده
أنـاغـم الـحـرف ذا بـاكـي وذا شــادي
وارسـل مـع كـل دمعـه وجـد تغـريـده
ياوابـل الغـيـث كــان الـحـظ بــه جــاد
يـزهـر حيـاتـي نــداه وتـزدهــر بـيــده
يـاركـب الايــام مـعـك الـعـمـر يـنـقـاد
كـم ليلـة(ن) وسّدتنـي فيـك تنهـيـده
ويارحلـة العمـر فــي صـحـوات ورقــاد
ويارعشة الجفن في غفوه وتسهيـده
في لحظة العمـر تسـري فـزّة فـوادي
لحظـه وفــزّه وبـاقـي العـمـر تـرديـده
الّلحـظـه الماضـيـه مـــا عـــاد تـنـعـاد
والقـادم مـن العمـر باالغـيـب تفنـيـده
ثـلاثــة ايّـــام لـلـرجّـال يــــا هــــادي
يومـيـن دنـيـاه ويــوم البـعـث تخلـيـده

يا ساعة الفرحه تشوقت للعيد

عيد العيون وعيد قلب الصبابه
رد الجمال لشوفتي يا اتلع الجيد

واسحب على حرفي لحون الربابه
حرفي بصوتك يا اجمل الصوت تغريد

يا رمز حبي هاك رمز الكتابه
يا صبح عمر فيك للعمر تجديد

وحبك يجدد كل يوم شبابه
للعين والقمرا وحسنك مواعيد

وليل الهوى شرع للأحباب بابه
ياما زعجت الصوت باسمك تراديد

وياما نسيم الوجد يمك سرابه
وياما تمنيتك على باقي الغيد

واقول مثلك يا غلا الروح ما به
ابيك تهوى مثل ما اهواك وتزيد

يا من خفوق القلب حسنك غدا به
يا قطرة الغيمه على يابس البيد

رد الحياة لخافقي يا ذهابه

قريـت خطّـك بـالوفـا عشـر مــرّات
فـي كـل مـرّه تنـثـر العـيـن مـاهـا

ذكرتنـي هــاك اللـيـال الجمـيـلات
لو كان قلبـي ذاكـر(ن) مـا نساهـا

من عقبكم مـا عـاد للعيـش لـذّات
مـا التـذّ فـي دنيـا مخالـف هـواهـا

اليـوم انـا مثـلـك جــداي التنـهـات
عينـي تهـل دموعهـا مــن عنـاهـا

هايم بعيـد الـدّار سهـران مـا بـات
أتبع هواجيس(ن) بعيـد(ن) مداهـا

نار(ن) تلهّـب بيـن الاضـلاع زافـات
نار(ن) لجت بالخوف العالي سناها

ماعاد لي بمطارد الصيد حاجه
إلاغزالن صادني قبل اصيده

ريمن لبس في عالم الزين تاجه
عزاه داري عن دياره بعيده

خشفن طعن قلبي وعنده علاجه
ماله سلاحن غير عينه وجيده

إلى اظلمت دنياي ولع سراجه
يمشي على دربه فوادن يريده


ياعاذلين القلب هذي سذاجه
خلوني آحبه واحبه وازيده


القلب قلبي والمخالج خلاجه
وكثر الحكي يااهل الحكي مايفيده

اخلفتني نظرة عيون الهنوفه
خلفة الصقار لا شاف الحباري

واقت النظره على قلبي تشوفه

واشعل بقلبي كما البرّاق ساري

صد عني طاغي النظره مروفه
ظالم(ن) قلبي وهو بالظلم داري

ياحبيبي صدتك عني حسوفه

ارسل سهوم الذوابح لاتداري

ارسل رماح الهوا وارسل سيوفه

يشتهيك القلب في كل الطواري

عيني لحسن الذي غيرك عيوفه

في عيوني غيرك من الحسن عاري

أعذرني يا سيدي الزّمان
فيني على الدنيا عتب



الرجل حيّرها المكان
و العين حيّرها العجب



تغيّرت كل الامور
و احترت في مفهومها



النايمه قامت تثور
و الصّاحيه جا نومها



النجم ماهو نجمنا
و الليل ماهو ليلنا



و الصّوت ماهو صوتنا
و العشق ماهو عشقنا



تمطر ولا يظهر نبات
و نبات ما جا له مزون



وعيون ما فيها حياة
و حياة مافيها عيون



اسافر بفكري و أتوه
و اناظر بعيني قريب



في عالمي زحمة وجوه
وانا مع الزحمه غريب



صقــّار ماعندي صقر
خيّال ماعندي فرس



بيني و فرحات الدّهر
من لعبة ايّامي حرس



قصيدتي لعبة عمر
و خيالتي صهوة سحاب



غنّيت في شمس و قمر
حضرت في لحظة غياب



طالت مسافات الزمان
وشلون ابقطعها مشي



فراغ مليان المكان
و خيالنا اصبح غشي

احـب اللـيـل و نـجـوم الليـالـي
حبيبـاتـي أسـاهـرهـن لـحـالـي

لقيت بصحبة النجمات سلوى
عقب ما فارق الخفّاق غالـي

ألا يا ساريـات الليـل سيـري
على واديه مع مسـرى خيالـي

تجـلّـي فــي سـمـا خــلّ الـمـودّه
و قولـي للحبيـب وش جرالـي

هـنـيـك يـــا نـجــوم تناظـريـنـه
و انا مالي على النظره مجـال ِ

و لكني ولـو شابـت عيونـي
احـب اللـيـل و نـجـوم الليـالـي

صبرت وكل حي لو تصبّر
الـى مالـت ليالـي العمـر مــال

اليوم اول السنه وامس آخـر العـام
و الشمـس تشـرق و المـلا لاهــي

في ساحة العمر كل(ن) يقرع طبولـه
ماشفت للنفس عن درب الخطـا ناهـي

كل(ن) على ماتبي نفسـه يطربهـا
و الذهن عن عبرة ايام الدهـر ساهـي

يا غافل القلـب لا يغريـك زاهيهـا
أفطن ترى الورد مايبطي و هـو زاهـي

ياجامع المـال يامـن غايتـه دنيـا
وش حيلتك في غياب المـال و الجـاهِ

دنياك لو زخرفت لك شمسها واضحت
ترى البـلا فـي خبايـا ليلهـا راهـي

لابد للـدرب مهمـا طالـت نهايـه
و العمر لو طال به حبل الرجـا واهـي

الرّابح اللي نسيم الحظ لـه ذعـذع
قـدّاه ربـه علـى التقـوى ولا تــاهِ

يا قصيدة عمري اللي تكتبينـــي
كل يوم حرف من نغمة هــــواك
ارحميني يالهوى والا اذبحينــي
لا تخليني معلق في سمــــــــــاك
كل ما اخذتي عمر مني عطيني
لحظة من ساعة داخل حمــــــاك
الحياة آشوفها والموت فينــــــي
واعذاب اللي بغاك ولا لقـــــــاك
اسهر الليل وقمر طيفك بعيــني
والشعاع الصبح يوقظ بي رجاك
أن حدى حادي تولاني حنينــي
وإن عرض طيفك على طرفي بكاك
كيف هذا من هوى قلبي يجيني
يا أرق الناس قولي وش دهـــــاك
لو تماديت بملامي سامحينــــي
قد تماديتي بذبحي من طغــــــاك

من كثر حبي لك تركتك وصديت
والقلب خالفني عليك وتركني
من شان عينك هنت عيني وضحيت
وش عاد لو سهر الليالي هلكني
ابيك وابعد عنك حبي وانا ميت
والوم حظٍ بالبلاوي شبكني
واذا دعاني حبي الذات عييت
احبك اكثر ياعذابٍ ملكني
لاجللك جميع ظروف وقتي تحديت
حتى الفراق الّي بضرسه علكني
لا ماتخلّى الحب ولا تخلّيت
كل مابغيت اعود يمّك مسكني

عبد العزيز..يا منية الأبطال في اليوم العظيم

عبد العزيز..يا دعوة المظلوم في الليل البهيم



يا باعث الأمل البعيد..يا طلعة الفجر الجديد

يا مسترد الملك ..والمجد التّليد

من يوم التوحيد الأول ..أعلنها دعوة صلاه

من يوم التكوين الأمثل..أعلنها مبدأ حياه

لا إله إلا الله محمد رسول الله



رايتنا دعوتنا....غاية منهج أمّتنا

لبّيناها ردّدناها....ونشرنا في الدّنيا صداها

ورغم الحاسد...ورغم الحاقد

بالتّوحيد اتحّدينا متحدينا .. جاوزنا الصعاب

بالتّوحيد اتعدّينا متعدّينا .. طاولنا السحاب



وبالتوحيد وحّدنا الإله

وحّدنا الوطن



** ** **

نجد أنا والفخر والمجد أنا

ما أبي غير من رأسه عزيز

دوني الموت والسّيف وقنا

ما أبي إلا أنت يا عبد العزيز

ولاح في نجد برّاق البشير

يوم قيل إن أبو تركي مشى

إن شهَر كل صقر ما يطير

وإن مشى كل ذيب له عشا

يا رياض العرب غنّي طرب

ويا قصيم السّعد جاك الوعَد

واقبلت حايل ترد النشيد

في هوَى الّلي علَى الكايد عنيد

يا راعي البيرق تقدم لاتعوق المسير

لا تاقف* إلا عقب توحيد الوطن والسّلام

حنّا هل العوجا لنا بالحرب يوم ٍ كبير

عاداتنا لَى ثوّر الدخَّان مثل الظّلام



وبالتوحيد وحّدنا الإله

وحّدنا الوطن

** ** **

أنا الحسا أنا النخيل..أنا العيون الجاريه

ما للهوَى يمّك بديل...يا ابن الأسود الضّاريه

وأنا موجة خليج ..عبر بها شيخ القبايل والفريج

من الساحل الشّرقي إلىَ السّاحل الغربي..لها عطر وأريج

وأنا الكنز الدفين علَى موعد مع التوحيد والتاريخ والملك الأمين



يا مرحبا ترحيبة العيد الجديد

بالّلي رقَى سور المعالي وانتصر

يا مرحباً يا جامع أطراف البعيد

يا غاسل قلوب الملا عقب الكدر

ملّيت من حكم الغريب

ملّيت بوقات السّروق

ياما نطَرتك يالحبيب

قلبي علَى وصلك يتوق



وبالتوحيد وحّدنا الإله

وحّدنا الوطن



** ** **



أنا الجنوب دربي عسير

وأصبح لأبو تركي يسير

مرحبَّا ألفين يا شيخ الشيوخ

صافحتك الرّوح من قبل اليمين

شامخ والشّيخ من فوق الشّيوخ

كل عاصي لَى وصل عنده يلين

من قلب الرّبع الخالي

من راس السّوده العالي

أخذت ضيم الّلي لفا

راعي الطّويله والوفا

ومن نجران ومن جيزان

وقلب الباحه لك ولهان

ورد وكادي وريحان

وفل وتهامه بك فرحان

الجبل والسهل والساحل يغني

والشجر والمطر والطير طربان

كل قلب ينام الليل متهني

نحمد الله على توحيد الأوطان





وبالتوحيد وحّدنا الإله

وحّدنا الوطن



** ** **



أنا الحجاز ...سيدي ولا دونك حجاز

عبد العزيز..يا من بحب القلب فاز

وأنا مكّه ...أنا مهد الهدى

وأنا طيبه ..مدينة من هدى

وأنا الطّايف أنا ورد الهدا

وأنا جدّه على خدّي ندى

قابلناك بكل الحب

عاهدناك بكف وقلب

وحيّينا روح التّوحيد

وأيّدنا عهد التّجديد

يا إمام العدل

حقّقت العدالة والأمان

يا كريم الأصل

أصّلت الكرامه والكيان

أول أمه عربيّه

في العصر الحديث

تعلن دولة إسلاميّه

قرآن وحديث





وبالتوحيد وحّدنا الإله

وحّدنا الوطن



** ** **

أنا الشمال...صعب المنال

لله أسلم للطّليب..لا من بعيد ولا قريب

إلا لاخو نوره رضيت..واللّه فلا غيره بغيت

لا يا بعد حي العرب..إنت الهوى وانت الطلب

لك يا العزيز الغالي..يا طربتي يا فالي



تحيّة للغايب إلى منه حضر

احلى من الروض الخضر

أحلى من الطعس الحمر



ياربيع الوسم يا ريح الفياض

يا رفيق الإسم ياراعي الرّياض

فيك اجتمع شمل الجزيرة كلها

فيك انعقد راي المسيره دلّلها

تبوكها مع جوفها لك تستخيل

وشعيب عرعر بالمودّه لك يسيل





وبالتوحيد وحّدنا الإله

وحّدنا الوطن



** ** **



وغاب الأسد ..وخلّف أسود تزود

لطّامة العايل* أصايل عريبين الجدود

أنا اليوم ..واليوم أنا

عهد الفهد أحلى العهود..جيل الفهد جيل الفهود

يافهد يا شيخنا...في يمينك سيفنا

أضرب القاسي يلين..يتبعك شعب أمين

شرعنا في ذا الحياه..مانخاف إلا الإله

حكّامنا منّا...يا سائلٍ عنّا

المليك المفتدى..والعضيد المقتدى

عزا الصّديق الّلي تحاشاه العدا

عبدالله سهم الفرسان..والسيف القاطع سلطان

نبني ونعلّي البنيان...ونفاخر كل الأزمان

نبني المعهد ..نبني المصنع..نبني الإنسان

واحتفظنا بالقيم...واشتهرنا بالشّيم

واكتسبنا من علوم العصر...نوعيّه وكم

ما تبهرنا لمعة برق..ولا قلّدنا غرب وشرق

المبدأ ثابت إسلامي..والمنهج واضح قدّامي

واصبحنا مصدر إشعاع..بالموروث وبالإبداع

يا ملاذ الخايف يا بلادي..يا فخار أجدادي وأحفادي

خير ونعمه..ورفعة سمعه

وعلى الله توكّلنا ..ولله توجّهنا

والمانع اللّه ..والمعطي اللّه

ياعابر الخاطر تصوّرت معناك
لا شك ماكل الخواطر تقالِ
خذ صورتك لَى جيت ساري بمسراك
مالك بها مصلوح تبقى ولا لي
تلقى من الشعّار الاقصين ذولاك
من ياخذ المعنى على كل حال
وأنا اتخيّر من معقّل مطاياك
مركوبة الفكره وافكّ العقال
إمّا سريت الليل مع نجم الافلاك
والاّ مع شمسي تبعني ظلالي
أوزن كلامي قبل يكتب بالابواك
واقلّب المعنى على ماطرى لي
الورد طيبي واتسوّك من الرّاك
والثوب ضافي والقصر راس عالي

يعطيك العافية

قصائد جميلة ورووووعة

سلمت يمناك