قصائد و اشعار الأمير خالد الفيصل

المعاناة


يا ليل خبّرني عن امر المعاناةْ
هي من صميم الذّات و الاّ اجنبيّهْ
هي هاجسٍ يسهرْ عيوني و لا باتْ
أو خفقةٍ تجمح بقلبي عصيّهْ
أو صرخةٍ تمرّدت فوق الاصْواتْ
أو ونّةٍ وسط الضّماير خفيّهْ
أو عبرةٍ تعلّقت بين نظراتْ
أو الدّموع اللّي تسابق هميّهْ
أعاني السّاعه و اعاني مسافاتْ
و اعاني رْياح الزّمان العتيّهْ
و اصوّرْ معاناتي حروف و ابياتْ
يلْقَى بها راعي الولَعْ جاذبيّهْ
و لاني بْندمانٍ علَى كل ما فاتْ
أخذتْ من حلو الزّمان و رديّهْ
هذي حياتي عشتها كيفما جاتْ
آخذْ من ايّامي و اردّ العطيّهْ

أجاذبك الهوى


اجاذبك الهوى واطــرب واغني
وابادلك الغرام بكــــــــل فنّي

واشاهد صنعة الله فـــي جمالك
وحكمه الذي فيـــــك امتحنّي

واشوف الودّ فـي عيونك ولكن
يردّ الودّ خوفٍ فيــــــــك منّي

ولا ادري وش يخيفك ياحبيبــي
وانا بك مغرمٍ جــــــاك متعنّي

ولو انك تلاحظ شفت عينــــــي
وهي تروي حديث الحب عنّي

تنعّم دام تــــــوك فـــــي شبابك
ليال العمر ماقــــــــط امهلنّي

تعال اسقيك من جدول غرامي
شراب فيه للعاشـــــــق تهنّي

واهيم بك بسمــــاوات المحـبه
الين انّك بعــــــــــد مثلي تغنّي

أبي منه الخبر


أبي منه الخبر و يقول للّه
لفى المرسول ما عيَّن محلَّه



و قلبي تايهٍ من عام الاوّل
ألا يا الله يسّر من يدلّه



خذاه اللّي على خدَّه علامه
سوادة غيم في شمسٍ مطلّه



سرقني ما دريت انّه سرقني
سلبني و أحسب إني فاطنٍ له



انا يوم أرسل عيونه لقلبي
عطيته مهجتي و المعطي الله



نصف زين الخلايق في عيونه
و باقي الزين في باقيه كلّه

طال السفر


طال السفر
والمنتظر مل صبره
والشوق يا محبوب في ناظري شاب
رد النظر
خليت بالكف جمره
سعيرها في داخل القلب شباب
عز الخبر
والمهتوي ضاق صدره
يا من يرد العلم عن هاك الأحباب
طيفه عبر
ما أرسل مع الطيف عذره
هو خاطره من لوعتي ما بعد طاب

هو ما ذكر
أن الجفا فيه كسره
للخافق اللي من هوى صاحبه ذاب

يا ما سهر
طرفي على حبس عبره
اردها والوجد للدمع جذاب

دمعٍ حدر
جاله على المنع جسره
عظيم وجدي للدمع شرع الباب

يوم وشهر
عزاه والعمر مره
والناس واجد لكن الولف غلاب

استكثرك وقتي



استكثرك وقتي علي و غدا بك

عادة زماني كلما طاب هــون
ليت الذي وداك يازين جابك

تشوف عقبك كيف الايام سون
شرق مشيت و غرب وقتي مشى بك

و القلب ماله لايم فيك لو ون
عقب الهنا بك ذاق لوعة عذابك

تلـونت دنيــاه ولا تلــون
طويتني طي الورق في كتابك

حتى معاليق الحشا لك تطون
اشتقت لايام الهوى في جنابك

يوم الشموع بليل الاحباب ضون
واشتقت اقول لهاتفك مرحبا بك

و اشتقت لغيوم الصحاري تكون
عود ترى داعي الهوى عند بابك

وارو القلوب اللي بعد ما ترون
غنيت لك عمري ولا جا جوابك

واسمي مع مجنون ليلى تدون

يا زمان العجايب

يا زمان العجايب وش بعد ماظهر



كل ماقلت هانت جد علمٍ جديد



إن حكينا ندمنا وان سكتنا قهر



بين قلبٍ عطيب وبين خلٍ عنيد



لو تفيد المدامع كان اسيل نهر



مير كثر التوجّد والدمع مايفيد



اصبر ايام واشهر واتصبر دهر



وان حصلّي مناتي جيت لوني بعيد



ارجي الله واراقب كل طالع شهر



يجلي الهم عني أو عساه مايزيد



ياغزالٍ فضوح الزين عنه اشتهر



في عيوني ملاك ووسط قلبي وحيد



مخطي اللي يشبه وجنتك بالزهر



الزهر ماله رماحٍ تصيب وتصيد



لوجحدت المحبه سقم حالي جهر



مير ماكل قلبٍ ياصل اللي يريد

أسابق الساعة



أسابق الساعة و تسبقتي الساعة



تقضي وانا توني باوَل ثوانيها



ابشتري و قت وين اسواق بياعه



يااللي تبيع الدقايق حد و اشريها



قلبي يبي وقت لو الوقت ما طاعه



و عيني تبي شمس لو الشمس تعميها



و نفسي مثل باقي الاجواد طماعه



أبي أجدد على الفرحة لياليها



لاشك الايام للفرحات مناعة



لفو نورت ليلةٍ عشرين تطفيها



يظهر ثبات الفتى و النفس مرتاعة



خوف على اللي نحبه من بلاويها



لو ان كلٍ ينال مناه بذراعه



خذيت حقي من اقصاها و دانيها



المشكلة انك يابو لحظين بتاعه



تاخذ سلاحي من الكفين و اعطيها



و انا ادري ان العيون السود خداعة



لاشك ودي أصدق منك داعيها



و المهتوي لا اهتوى ما يطوي شراعه



يمشي على النار كنه ما وطى فيها

لو يبور الملا


لو يبور الملا مااحسب حبيبي يبور
و احسب اني اموت ولا يموت الوفى
و احسب انه على هاك المودة غيور
مااحسب ان الشعاع اللي بقلبه طفى
كيف يا نور عيني و انت للعين نور
يختفي نور وصلك في ظلام الجفى
أثر قلبك على فرقا الولايف جسور
واثر طرفك إلى سهرت عيوني غفا
وينه هاك الونين اللي يشق الصدور
و وين هاك الدموع اللي تشق الصفا
كل حي إلى دارت لياله يدور
و كل قلب إلى عفت عروقه عفا
ويل قلب توالت فوق قلبه كسور
كن جرح الهوى ياصاحبي ماكفى
ألتمس لك عذر لو ما انت معذور
و ان جحدت المودة بان لك ما خفى

يا صاحبي

يا صاحبي هانت عليك المحبة




لا واحسايف عقب هاك المواثيق



جمر الغضا في وسط قلبي تشبه




نار حطبها يابسات المعاليــق



كاس مليته بالوفا لا تكبــه




خله يبلل بالوصل يابس الريق



صبه بقلبي ثم ملّه و صبه




و ان كان ودك غرق القلب تغريق



دام الهوا راسي وراسك يهبه




خذ سجةٍ ترى زمانك توافيق



ترى حلاة العمر مع من تحبه




شخص تريده من جميع المخايق

يا وش بقى



يا وش بقى باعطيك مني ولا جاك

ماباقي الا روحي أحيا بها لك
أوصف جمالك كل ما انشدت و اهواك

و ازين أيامي بجلسة خيالك
يا الغايب الحاضر بقلبي و لا القاك

أقرب من عروقي و صعب منالك
شالك زماني عن عيوني و وداك

لا شك وثق في ضلوعي حبالك
يا حاجب شمسي ورا ليل جفواك

ما بالعهد بك قاسي في دلالك
وش غيرك يا منوة القلب و اطغاك

على حبيب ما تخير بدالك
دنياي ما تصلح بلا شمس دنياك

و الليل يوحش لو تغير هلالك
ما ينقطع ظما الهوى إلا على ماك

ولا يهون حره إلا ظلالك
ولا تشوف العين زين بلياك

ولا يطرب سمعي إلا مجالك
ولا انتفض قلبي من الحب لولاك

ولولاك ما يبدي علي ما بدالك

الحزن في صوتك



الحزن في صوتك ازعج ساكني



لين صار الكون من حولي حزين



غصب عني حزن صوتك هاجني



لين خلى عاصي المعنى يلين



و امتثل حرف القصيد و عادني



و انسكب حزنك على شعري حنين



شلت انا صوتك و حزنك شالني



أكتم الصرخة و ينساب الأنين



شفت حزنك كيف حزنك شافني



كيف داهم خلوتي في لحظتين



طير أنا مثلك زماني ضامني



جرحتني مثلك سيوف السنين



صابك اللي من زمان صابني



في معاليق الحشا جرحه دفين



كلما ودعت هم زارني



من عذاب الوجد بياح الكنين



الفرح عقب الصداقة هابني



خافت البسمة على وجهي تبين



طير يا اللي صوت حزنك هاضني



الله اللي ينتصر للصابرين

استريحي يا الظنون الثايرة


استريحي يا الظنون الثايرة

لا تشبين الحرايق بالخضر



دام الافلاك بسماها سايره



كل مطلع شمس له علم و خبر



يستقيم الخط والا دايرة



الله اعلم وش مع غيب القدر



العفو ماهي بعيني حايرة



حيرتي بالفكر ماهي بالنظر



و روحي اللي في فلكها طايرة



مالها لو حولت عندي مقر



يوم زادت بالثرى عثايره



حلقت و الجو محفوف الخطر



بعض تلات الخوافق جايرة



و الذي قد جرب التله عذر



التوى قلبي على سرايره



و الهوى فضاح مكنون البشر



لو بغيت اجحد تبين فايره



له حريق و له شعاع و له شرر



و الغزالة في فلاها ذايره



الله اقوى قد لها فوق الشهر



من يبشرني و له بشايره



السما و نجومه بشارة قمر



قالها اللي فتحت بصايره



شاف و استعبر و عبر و عتبر

ميلت نجمة حياتي

ميلت نجمة حياتي للمغيب



و دعتني راعها فجر المشيب



ليلة من برد في صحرا زمان



عشتها في غربة الدنيا غريب



عشتها جاهل و عاشتني حكيم



الخطا واجد و مرات تصيب



بينت فيني تجاريب الحياة



كل سيل حط في دربه شعيب



الصخر تشقه سيوف الدهر



كيف تسلم خفقة القلب العطيب



و الرياح تشيل كثبان الرمل



كيف زهر العشب يبقى ما يغيب



أجمع حروفي و اشكل صورتي



و الغريب اجمع شتاته بالعجيب



مرة ترقص حروفي للهوى



و مرة اسمع من حروف نحيب



هاضني صوت الضمير إلى شتكى



اختنق ماله سميع و لا مجيب



و هاضني شكوى القلوب من العقل



ضامها كنه على الدنيا رقيب



كلما صاح الضمير و ون قلب



سالت حروفي على دمعة حبيب

ليت العمر يهدى

ليت العمر يهدى .. أبهديك عمري



تستاهل الايام يا زهو الايام



لو الهوى المحبوس في جوف صدري



يظهر على العالم غشى العالم هيام



فيني غرام فوق محمول صبري



و فيني خيال فوق تصوير الاحلام



صباحي اسرحلك و في ليلي اسري



و إلى هجع فكري خفوق الهوى قام



و الله مالي غير الأشواق عذر



و اللي عرف شوق المواليف ما لام



يا من يبيع الصبر يا ناس و اشري



محتاج كل الصبر و اصخي بالاقيام



يا مالك امري وش نواياك بامري



ارحم خفوق عن هوى غيركم صام



حالي غدى مثل المساويك مبري



يا باري حالي ترى البعد ظلام



أدري بحالك و انت بالحال تدري



ياالله عسى ذا العام أحسن من العام

حول سحابي

حول سحابي و احسب اني وصلته

و هبت هبايبها و شالت سحابي
حلم على غفوة زماني حلمته

ليت الزمان اللي غفى ما صحا بي
في غمضة من ليل عمري سرقته

لا شك حظي من عذابي وشى بي
الليل يوم انه صحا بي جرحته

و العمر في مجروح ليلي سرى بي
من وقتي المجروح لجروح وقته

يمشي و حظي بالعثاير مشى بي
لو ان قيدي في يميني كسرته

مير البلى قيد الغرام التوى بي
الله من صوت على الشوق جبته

و الله على كلمة غلا في كتابي
اطوح المسحوب مع كل نهته

و اسمع على همس الليالي جوابي
يا معشر العشاق قلبي عصرته

قطرات خفاق من الوجد ذاب
على عشير بالوفى قد وعدته

لو شبت أحبه مثل فتنة شبابي

ما هو صحيح



القلب للقلب شاهد



لو هو صحيح أصبحت مفتون فيني



بيني و بينك حب من قلب واحد



ليته يجيك من الهوى مايجيني



و ليتك تعرف الشوق لى صار واجد



و ليتك تعرف أوجاع كثر الحنين



ما قد شكيت الحر و الجو بارد



ولا سهرت بليل طول السنين



ولا مشيت العمر و الحظ قاعد



ولا تحديت الألم و الونين



أضحك و انا لجروح الاحباب جاحد



أداري المكنون عن كل عين



ما ودي أفرّح على القلب حاسد



و الا عذابي في عيوني يبين



شيٍ يهون و شي بالحيل كايد



ياكود تجريح الخفوق الحزين



من عانده وقته و قلبه يعاند



مالت به الدنيا يسار و يمين



غرني امثال العرب بالشواهد



يبيك قلبي و احسب انك تبيني

يا صقر


يا صقر وا هنيك لك جناح تطير

لى طرى لك نزعت و طرت يم الهوا
بين قلبي و بينك فرق والله كبير

لى كفخت انطلقت و لى كفخت التوى
انت حايم و انا بالقاع دوبي أسير

في صحاري زماني ذيب ليلي عوى
فوق جوك سحاب و حدر جوي هجير

القدم فوق رمضا و الخفوق اكتوى
الحذر يا صقر لا يشبكونك أسير

ويل صقر يتله مربطه لى نوى
برقعته الليالي فوق وكر قصير

عقب صفقة جناحه بالهوا لى اهتوى
كل حر إلى ضاق انتهض للمطير

حومته بالسما ساعه لقلبه دوا
وا عذاب الجناح اللي يجره كسير

كلما فز مكسور النواهض هوى

استطيع امنع لساني

استطيع امنع لساني لايقول

و استطيع امنع عيوني لاترى
و استطيع امنع يديني لا تنول

و امنع اذني عن سواليف الورى
لكن المشكله أنا وش لون أحول

دون فكري لو خيالي به سرى
شارد افكاري على رغمي تجول

كلما عن الهوى والا طرى
كل نجم للخيال اصبح ذلول

بالفلك طواف لا ضاق الثرى
شاغلي يا راعي الطرف الخجول

باع حبك في خفوقي و اشترى
يا ربيع القلب في كل الفصول

ورد حبك فاح عطره و ازهرا
مرني طيفك على العادة عجول

عز طيفك مثلما عز الكرى
مانفع تحذيري القلب الجفول

يرقد الخالي و عيني تسهرا
باسألك قل لي ولو فيها فضول

كيف تذبح من يشوفك ما درى

الذاهبة

ياالمعرفه ياما سعيت



أدورك و انتي شرود



أمشي و اصوّت بالحياة "
" يامن لقيت الذاهبه



دخلت أدور كل بيت



و ظهرت أدوج بالنفود



و اسأل مراكيب الزمان "
" الشارقه و الغاربة



و لساري النجمة سريت



لعل نجماتي تجود



ياشاهدة سر الزمان "
" عطيني سر الغايبه



سافرت للبعد و مشيت



أتبع فوانيس الوجود



و ازور واحات القلم "
" عند العجم و العاربه



عودت للحرف و قريت



أبي من الكلمة ردود



لقيت كتاب الفلاه "
" تطرد نياق هاربه



ياالمعرفه دونك غديت



و الحد من فوقه حدود



و المدعين المعرفة "
" أجهل من اللي طالبه



أبعد من أيامي مشيت



و الحمل بالكاهل يزود



رجل توردني خطر "
" درب العباد التايبه

الذكرى


في غير الزّمان في نفس المكان

مَرّتني الذّكرَى وأنا واقف في نفس المكان

في غير الزّمان في ذا ضحكت أيّام لكنّي بكيت

في ذا حلمت أحلام لكنّي صحيت منها أبتديت

وفيها أنتهيت إلاّ من الذّكرَى

في نفس المكان في غير الزّمان

قالت لي الذّكرَى كلام عنّي كلام واللّه بغيت أنساه

وصاحت ربابة شوق واثر النّغم منّي .. يشكي وانا شكواه

وغنَّى صوت في ليلة فرح

وهلّت عين وقلب أنجرح في صوتها جرح وْتعب

وفي عينها نظرة عتب وشفت إبتسامه عليها هلّت الدمعه

ونظرة ملامه من الماضي علَى ربعه وانا مع الذّكرَى

في نفس المكان في غير الزّمان

تعطيني الذّكرَى ولا تاخذ أبد تحكي لي الذّكرَى ولا تسمع لأحد

وانا عندي كلام ممنوع حتّى عن الخاطر لا ياخذه أمسي ولا يقبلـه باكر

ما اقدر أوضّح غايم الصّوره ولا أزوّد للمسا نوره

اللّه يا ذكرَى ياما فهمتيني خطا ياما قدم رجلي علَى جمرك وطا

واليوم هيّضني هواي أشكي ولا أدري وش بلاي

هو من شقاي الّلي مضَى والاّ هناي

وانا مع الذّكرَىفي نفس المكان

في غير الزّمان

إرفعـي سهـم المنايـا

إرفعـي سهـم المنايـا يالعيـون

مابقى فينـي مكـان(ن) للطعـون
كل شبر(ن) فـي حياتـي إنجـرح

و الذي شقّـوا خفوقـي يشتكـون
يا العيون الطاغيـه خفّـي علـي

كبرت اللّـي بـاوّل ايامـي تهـون
فـي عيونـي دمعتيـن واقـفـه

ردّت الايـام دمـعـي بالجـفـون
بالغَـت فينـي تباريـح الـهـوَى

و أستبدّت بي المواجيـع الظنـون
خبّرينـي يـا غـرام العاشقـيـن

كيف يستهوي هل العشق المُنُـون
إرحمي قلـب(ن) تجاريبـه قسـت

في زمان(ن) ماعرف يوم(ن) حنون
اللسان يخـون و البسمـه كُـذُوب

و اصدق التعبير نظـرات العيـون

ياقلبي اللي من هوى البيض معتـاذ

ياقلبي اللي من هوى البيض معتـاذ
واليوم اشوف الوجد والشوق بـذه
حسبي على اللي للمواصيـل جـذاذ
حبل الوصل من بيننا البعـد جـذه
يسقـي منـازل ليّـن العـود رذاذ
يلقى بهـا ظبـي الطعاميـس لـذه
الصاحب اللي عن هوى القلب ما لاذ
لا قلت دوك القلـب يازيـن غـذه
ولا نيب من هرجـه كثيـر وهـذاذ
ما شاف فـي ليلـه نهـاره يهـذه
عساك تأتي لـي يابـو زيـد نفـاذ
قلب ٍ تحذّى الشـور ياخـوك حـذه

***
فأجابه الشاعر الأمير محمد السديري ب
***






أسهر طوال الليل واغضي على الحاذ
وعن الصديق القلب ما فيـه شـذه
شكتواك خلت بسـرة القلـب تخـاذ
ولا عاد في قلبي من الصبـر فـذه
اللي يا بو بندر جعـل قلبـك افـلاذ
مشربك يا ممـدوح الأفعـال عـذه
طفل ٍ سهم عينـه بالاعمـاق نفـاذ
والحق عليـك بقـذة ٍ عقـب قـذه
ان كان مالك فيـه مدخـل ومنفـاذ
له الشبك في مدهـل الصيـد بـذه
وإليا دخل وسط الشبك يابن الافـذاذ
غوجـك لساعـات المهمـات حـذه

يبكي الصوت و النظرات تشكي


يبكي الصوت و النظرات تشكي
و المعانـي ولـو صاحـت حبيسـه

يصمـت الليـل و التنهـيـد يحـكـي
و المعاليـق فـي قلـبـي يبيـسـه

يـا حبيبـه سألـت الليـل انـا عنـك
و كـل نجـم فـقـد مثـلـي أنيـسـه

هـل دمعـي و قـام الليـل يبـكـي
و القمر نشّ مـن فرقـى جليسـه

ويـل مـن شالـتـه مـوجـة بـحـرك
ليتنـي مـا نزلـت الشـط أقيـسـه

لو لمستي البحيـر بأطـراف يـدك
مـن حلالـك غـدا طعمـه مريـسـه

للهوى حــس اذا لامــس زهــرك
ينعش القلب اذا جاني حسيسه

أنا تسّلى بالشعر لـي توصّفـت

أنا تسّلى بالشعر لـي توصّفـت
وإلاّ فلا بالقـول مهنـة حياتـي

ما قد سرقت البيت وألاّ تسلّفـت
ما أقلّد الشّعار شعـري مرآتـي

أنظم ثلاث عقود واليـوم ولّفـت
مع أول الرّابع ثـلاث خزراتـي

ما أناظر اللي راح.. ما يوم وقّفت
عيني لباكر وش معه لي ابياتـي

ولاني بقايل(ن) ليتني ما تصرّفت
الحمد لله حافـظ(ن) كـل ذاتـي

وش عادلوني في حياتي تكلّفـت
يلعن ابو قلب(ن) ترّيـح وماتـي

كنّي مع نجوم اللّيالـي توظّفـت
أساهر النّجمـات حـل المباتـي

وأسبابه اللّي من عيونه تعرّفـت
إني قتيله يـوم شـال الغطاتـي

أنا أشهد إنّي في غرامه تطرّفـت
وصلت حد الموت قصدي مناتـى

من أول(ن) في حب خلّى تلطّفت
واليوم أقول ألطف بحالي غناتـى

تعال أسهر

تعال أسهر معك يا اسمر عشيّه
تعال أسلي خاطرك يا عيونـي
تهن وخل عينـي بـك هنيّـه
أنـا ويـاك والدنيـا تهـون
تـرى الدنيـا لياليهـا شقيّـه
حذاري تستبـد بـك الظنـون
نويت وكـل قلـب فيـه نيـه
على اني لك وفي روحي تمون
هواك بخاطري سـوا سويـه
تركني بين أياديك معنون (1)