قصائد و اشعار الأمير خالد الفيصل

سافر
سافر عسى ربي يحرسـك وياقـاك
هذا البخت عزّاه وش فـي يدينـي
يا شين باكـر يـا حبيبـي بليّـاك
لا جاء وعدك اللي بوقتـه تجينـي
لي قمت أدوج في مداهيل ما طـاك
يا ما جرى بشهـار بينـك وبينـي
هذا وهو تـوّك تطـري بممشـاك
وشلون لي قفيت يـا نـور عينـي
يا شيب عينك يا هوى البال واشقاك
كانك مثل ما أبيك يااسمـر تبينـي

طفلة خطا
لقيت الحزن في عيون طفلة خطا مرسوم
قضى دمعها والعين تبكي ظلايمها



لفظها رصيف العمر في شارع مزحوم
تزاحم عيون الناس والهم زاحمها



ترد النظر لعيون من ناظروا مهزوم
إلى شافت العينين فيها هـزايمـها



على هامش الدنيا رضت همّها المقسوم
وراحت تمرغ بالندم روح ظالمها



على هامش الدنيا وبالدايره مغروم
عزّل واعتزل روحه وخسرت غنايمها



لهم رحمة الإسلام ما باقي معصوم
عسى يقدي من غدا في عوالمها

نَعَمْ شاعْرك

نَعَمْ شاعْرك وافخَـرْ بالسّمـاوه
وسامٍ فيـه عـزْ ولـه حـلاوه

وانا وَلَدْك وجندي مـن جنـودك
حَدِرْ لازمْكْ في حَضْر وُبـداوه

أحبّك واحترم رايـكْ واطيعـك
وفـيٍ بالرّخـا ويـوم القسـاوه

وافاخر بالملك ـعمّي ـواجاهر
وانبّه من علَـى عينـه غشـاوه

ملكنـا غالـيٍ والعهـد غالـي
وغالي الـرّوح للغالـي فـداوه

فهد زَيْزُومنا فـي كـل ساحـه
ظَهَرْ له بالوغَى ضرس وْضراوه

نصادق من رضَى عنّـه ملكنـا
ومن عـاداه لـه سـمّ العـداوه

إذا عـاداه غـاوي ردْ يـمّـه
وقـدّم لـه مراسيـم الرّضـاوه

يجي عنده ويشكي سـوْ حالـه
علَى جفْوَى الملك شاف الشّقـاوه

مثل مأسورْ يبكي عنـدْ فـارس
يبي عفـوه وهبّـات الطّـراوه

مريضٍ علّتـه غضبـةُ فهدنـا
وقالوا يـا طبيـب الوقـت داوه

عَذَرْهُم شيخنا من كبر شخصـه
وكفّـه بالعطـا يقطـر نـداوه

يقولـه شاعـرٍ يفـدي عمامـه
ولا يبغي علَى الرّاتـب عـلاوه

لا ترحلي







لا ترحلي يا أغلى ما عندي علَيْ

كوني معي شوفي و صوتي و مسمعي

الدّنيا من غيرك وهم

معزوفه ما فيها نغم

إنت الحياه

إنت الهوى

و انت الشّجن

إنت العشيره و الوطن

و انت هلي

لا ترحلي

تعالي

زفّي لي الفرح

داوي الفؤاد اللّي انجرح

غنّي الاماني

ردّي زماني

تعالي بعيونك أشوف

و اشكل ألوان الظّروف

تعالي غنّي الحب

اللّي انتشَى منّي علَى دربك حروف

لا ترحلي

يا واجد الشّوق

اللّي يسهر ناظري

يا أعذب الذّوق

اللّي يزيّن حاضري

لا تبعد الفرحه

و انا لي بك نظر

لا تاخذ البسمه

من شْفاه العمر

تراي أنا مالي بعد شوفك صبر

لا ترحلي

تساوت


تساوت عندي الدنيـا تسـاوت

وهي يومك قريب(ن) لي تفاوت
حياتي عقب نورك مثل ليل(ن)

جميع نجومه من أدنى تهـاوت
ألا يا ناصح(ن) بالطب روحـي

تراها لو لقت طب(ن) تـدوات
ولكن من يعوّضنـي بخـل(ن)

معاليق الضمايـر بـه تـلاوت
أنا وياه مـن عهـد الطفولـه

مثل قلبين في صدر(ن) تخاوت
يجي عقبه فرح و إلاّ حزايـن

تساوت عندي الدّنيـا تسـاوت

اجمل العشق

المهل ساعة عسى البسمة تدوم
ظامي(ن) للحب من يومك أصوم


بلّـل القـاع اليبّـاس الميّتـه
إحيها من ديـم هتّـان الغيـوم


أقرب أضمك بجنحـان الهـوى
أقرب أورّيك رقصـات النجـوم


وخلّني ألفّـك بطيـف الشعـاع
فوق مزن(ن) بالهوى دايم تحوم


ألمس بكفك مواجيـع الهـوى
واطرد من القلب وخزات الهموم


بيني وبينك من العشق اجملـه
أطعمْ واشهى من طيوف الحلوم


استضافتنـا الّليـال العاشـقـة
اشعل الضيّان واصحى لا تنـوم


لا تفوّت فرحة العمـر القصيـر
الغثا متوفر(ن) فـي كـل يـوم

يــا سائلـيـنـي

يــا سائلـيـنـي لـيــه غـابــت حـروفــي
مــــا بــاقــي إلاّ نــازفــات الـرعــوفــي

الـحــرف يـنــزف والمـعـانـي شـهـيــده
سـطـا بـهـا وقــت الجـهـل بالسيـوفـي

تــراجــع الـعــقــل والـعــلــم والــكـــرم
وتـقـدّمـت رجـــل الـجـهـل والكـفـوفـي

كل(ن) لقى له في هوى النفس متعه
سـاد الـذهـب والجـيّـد الّـلـي يحـوفـي

أقــولــهــا ولــــــي بـــالأيـــام خـــبـــره
قـلّـبــتــهــا وقـلّـبــتــنــي ظــــروفـــــي

نـقـلـتـهـا ثــــــلاثْ ســنــيــن حـــجّـــه
يــوم(ن) حـزيـن ويــوم تـقـرع دفـوفــي

كــل(ن) يـمـوت وطـيّـب الـذكـر بـاقــي
خـطـلان الأيــادي مكرمـيـن الضيـوفـي

سلّـم علـى الّلـي كـل مــا زاد حمـلـه
شــال الـحـمـول وقـدّمـتـه الصـفـوفـي

هـذا عـلـى غـيـره مــن الـنّـاس يـفـرق
كـريـم نـفــس(ن) بالـمـراجـل يـنـوفـي

حطّـه علـى يمنـاك لـي صــرت ضـايـق
ماهـوب عــن حــوض المنـايـا عـزوفـي

يعـجـبـك بالـحـضـره ويعـجـبـك غــايــب
ويعجـبـك إذا كـثـرت علـيـك الـصـدوفـي

بنت الكحيلـه


بنت الكحيلـه مهرتـي
وخيالتي من كل اصيل

ألقـى عليهـا طربتـي
بين المعنـق والشليـل

صدر وقطـاة فلوتـي
العنق والساق الطويـل

وقع الحوافـر نغمتـي
وحداتنا رجع الصهيـل

أبوي وجـدي قدوتـي
لو ما لهم عندي مثيـل

بالدين تفخـر عزوتـي
والرمح والسيف الصقيل

ماكر حـرار ديرتـي
ما في هل العوجا ذليـل

طالت القامات


هل خير .. وحل خير .. وعم خير
ويسر الله كل امـر فـي عسيـر

وامطرت سحابة الحـب العظيـم
والهوى في كل قلـب لـه غديـر

وغنت الاطيـار واهتـز الشجـر
والزهر يفوح من عطـره عبيـر

وكل وادي سال بجمـوع البشـر
حادي الاشـواق داعيهـا تسيـر

تضحك الفرحة على وجه البـلاد
وكل قلب كاد من فرحـه يطيـر

وارتفع في كل كف سيـف عـز
وطالت القامـات باليـوم الكبيـر

ياولي العهـد شرفـت الجنـوب
والرجال اللـي تسابـق بالمسيـر

من تهايمها ومـن كـل السـراة
ومن سهلها جاك سيل لـه هديـر

يهتفـون بإسمـكـم حــب وولا
وينذرون عداك بالسيف الشطيـر

قادهـم عهـد لكـم منهـم قديـم
يرخصون الروح لى صاح النذير

التلاحـم والثـقـة والانسـجـام
بين شعب وقادتـه مالـه نظيـر

بين بـارود البنـادق والسيـوف
بالمحبة عانـق الشعـب الاميـر

عرضة فيها الوطن لحن وقصيـد
إنتشى الشايب لها قبـل الصغيـر

كـل نـاس يفـرقـون بمـيـزه
والسعودي فـرق ميزاتـه كثيـر

الشهامة .. والشجاعة .. والكـرم
والوفا .. والحب .. والدين الغزير

وداع يـا نفـس


وداع يـا نفـس قدرهـا دعـاهـا
تنازعت والموت ما عنـه مـردود

تشبّثت بحبال زخـرف(ن) حياهـا
تبى نهار(ن) زود واليوم موعـود

تسلّلت مثـل الهـوا مـن خفاهـا
عجزَت تقضّب في ذرى يابس العود

تبخّرت روحي من حيـاض ماهـا
يتلّهـا نــزّاع الأرواح بـركـود

بالهون يا نـزّاع روحـي تراهـا
باقي عذاب أيام بيض(ن) على سود

قالوا علامك

قالوا علامك قلت ما بـي خـلافِ
ما بي بلا يا كود فرقـى? المحبيـن

الحب لـو يجحـد عليلـه يشـافِ
يدري به الّلي عارف(ن) لوعة البين

شي(ن) يشافي وشيْ بالجوف خافِ
عشر(ن) تبين وخافي(ن) منه تسعين

سلمت اناملك
يعطيك العافية

حدني وقتي على شي(ن) جديـدِ
السهر ما هوب من عادة عيونـي

أَبعدوني عن هوى بالي وسِيـدي
وامنعوا عنّي خطوطه ياصلونـي

شطّروني عنه في دار(ن) بعيـدِ
حسبي الله كانهم منـه اقطعونـي

صارت الفرقا لنا علم(ن) وكيـدِ
ليتهم راحوا وأنا عنـده نسونـي

عاقني عن صاحبي سور(ن) حديدِ
دونه البحور حراس(ن) ودونـي

الرجا بك يا بو خالد يا عضيـدي
لا تخلّينـي تراهـم عذبـونـي

عاش للمجد سلطان به الجود زايـم
قدمته المكارم في نحور المسيـره

ماينول المراجل كود خصم الخصايم
مثل ابوخالد السلطان في كل ديـره

طبت من كلمتك لي ياقوي الشكايـم
أستمد العزايم منك وارقى عسيـره

ياطبيب القلوب اللي مرضها هضايم
في زمان صغيراته غدت بالكبيـره

وياظلال الوجيه اللي شوتها السمايم
مالقت بالمظامي مزبـن تستجيـره

ويا دليل العقول اللي تخبط هوايـم
كنه الجدي في ظلماتهـا نستشيـره

ويا ربيع الهقاوي عقب ماهي هلايم
من تعلق جنابك يرتوي من غديـره

حاضر بالمراجل مثل ماهي قدايـم
أمسك ويومك وباكرمعك له ذخيره

لو نسيت العمر ما انسى دمعتـك
صرخة(ن) ذابت من عيونك دموع

ترتعش مرتاعة(ن) فـي وجنتـك
وانتفض قلبي لها بيـن الضلـوع

أزعَجت صمت الليالـي عبرتـك
بالخفا ثوره وبالظاهـر خشـوع

تسكب الدمعه وتظمـى نظرتـك
مشهد النظرة وهي تظمى يـروع

يا ضياع العمر ضيعـة بسمتـك
ضاع معها خافق(ن) مثلك جزوع

ليت من يمتص جـارح لحظتـك
والفرح يشعل دياجيـرك شمـوع

قامت تعاظم غربة الروح يـا سعـود
يالله دخيلـك و استـجـدّت جـدايـد
تغرّبت وسـط الجسـد روح مجحـود
في دارهـا وشلـون راحـت بدايـد
والشوف ذاب و خالطت بيضها سـود
و الزّود نقص وناقـص العلـم زايـد
من اول(ن) و الطيب للناس مقصـود
و اليـوم صـارت طيّباتـه شـرايـد
للوقـت تالـي مثـل باديـه مشهـود
فيه الجهل عوّد علـى النـاس سايـد
يا عازف(ن) عمري على نغمة العـود
هـذي حياتـي غنهـا لـي قصايـد
مر(ن) على الهيّن و مر(ن) على الكود
وعمر الفتى لحظـات هيّـن و كايـد
واسمع من الخفّـاق رجـع و مـردود
قلب(ن) مع الونـات قـد لـه عوايـد

ياسامرين الليل في بحـر الأشـواق
يـا ليتنـي معكـم يلـوح شراعـي
بين القمر والمـوج لمعـه وبـرّاق
والنسمـه العذبـه للغاليـن داعـي
القـرب يالغاليـن للـروح تريـاق
والبعـد ذَبّـاح القلـوب الوجاعـي
لا واعنا اللي باطرف الليل مشتـاق
خلّوه ربعـه مـع سـلام الوداعـي
يسهر مع الذكرى على صفر الأوراق
في صفحة(ن) تشرب دموع اليراعي
بين الرجا والياس وقّف على سـاق
والدرب بقلـوب المواليـف ساعـي

سرى سرى مع ساري الليل بالي
الشّوق داعـي والمـودّه دليلـه
على جناح الليـل ميّـل ومـالِ
في رحلة(ن) لأهل العيون الكحيله
أنا وهـو لـو باعدتنـا الليالـي
بين القلوب عناق خـل وخليلـه
يا غالي الهاجوس هاجوس غالي
شلني معك في جو ضافي الجديله
في ليلة(ن) قمرا هواها صفالـي
لى غاب بدر الكون خلّي بديلـه

عفا الله عن قلب من الحب مـا عفـا

تحده عيون الشيخ والقلـب ميـلاف
ينام الملا والشيخ سهران مـا غفـا

ولا هو بممروض ولا هو بمتعـاف
يقنب قنيب الذيب بالليل وان عـوى

ترد النجوم اعواه من هول ماشـاف
والصبح يسرح هايم القلب لا مشـا

ومن راس مشراف علـى مشـراف
صويب الخفوق ولا لقى للخفوق دوا

يقدر عليـه السيـر قـدام وخـلاف
صحيح الهوى قتال في حالة الجفـا

فلا شك من يسلي عن الغالي الجاف
تعرض جميلة صيد في مرتع الظبي

تقود الجميلة ناهية كـل الأوصـاف
عنود تتل القلب مـن سابـق المهـا

لها في خفوق الشيخ مربع ومصياف
رمته العيون مـن قبـل مـا رمـى

وعود خبير الصيد مصيود ياكافـي
وذي عادة القناص يصبر على القصا

يشيل الحمول اللي ثقيلات واخفـاف
ولا بد للطلاب ياصل علـى المـدا

ولو عارضه عذال وان جاه حساف
ومن يطلب المثمون يشريـه لوغـلا

ومن يطلب العليا يجنب عن الهافـي
ولولا اختلاف الراي تساووا المـلا

ولا بين القاصر ولا بيـن اسنافـي
تشاكيت يا محمد عقب كل ما جـرا

ولك بالخير ثوب من المعرفة ضاف
ومثلك سديد الراي يسهـدي الهـدى

ولك عملة تصرف مع كل صـراف
تكرمت يا محمد على اخوانك بالنبـا

وانا مع صدوق الود روحت لك قافي

ليت عقل العود في سن الشبـاب
وحكمة الستيـن فـي عشرينهـا

كان ما جرَ القـدم درب العـذاب
وانتهزت ظروفهـا فـي حينهـا

وكان ما ضاعت دقايقهـا هبـاب
وكـل لحظـه أستغـل سنينهـا

كم تركت من الفرص واقفلت باب
بعتها واهـل الفـرص شارينهـا

وان نصحني ناصح أحسب حساب
قلـت يمـدي .. توَنـا بادينهـا

العمر بـاوَل زمامـه لا تهـاب
والَليـلْ طـوال يـا سارينـهـا

ما هقيت إن الزمن مثل السـراب
والَليـالـي خيَـبـت راجينـهـا

أثر ساعات العمر مثل السحـاب
بالظلام تمـر مـا نـدري بهـا

ويل من همَاته صعود الهضـاب
ترجمـه ريحانـهـا بايدينـهـا

وحظ من همَاته يحـوش التـراب
يبشر بكثر الذهـب فـي طينهـا

وكل قصر له أساس وسقف وباب
يحكمـون اركانـهـا بانينـهـا

والصيانة للقصـر وإلا الخـراب
أفطنـوا للـدار يـا حامينـهـا

من بـلاه الله تصبـر واحتسـب
عادة المسلم على الشدة صبـور
اتلمس للخـوي عـذر وسبـب
لي لحقني من بعض ربعي قصور
واتحمـل زلـة كحيـل العـرب
واتحاشا عضة الكلـب العقـور
اعشق الغالي ولاهـوب الذهـب
وانزل العالي و لاهيب القصـور
في هجير العمر خاويت التعـب
فوق رمل البيد او موج البحـور
كل حي في حياتـه لـه طلـب
ذا تهيالـه وهـذا فـي دبــور
لا تعجب ما على الدنيـا عجـب
حكمة الرحمـن خلاهـا تـدور

قالت أبوك وأغمضت عين الأسى
فـــرأيت هولاً أعجـز الأهوالا



ولمحت في غور العيون تساؤلاً
هل أنجب الرجل العظيم رجالاً



لم أسكب الدمع الحزين وإنمـال
رمت المثال من العظيم مثالا



لا ينثني عزمي وفيصل والدي
لاعٍشت إن لم أحتذيه خٍصالا

ارسل له عمه الامير سلطان هذا البيت:



الله على الصاحب المنحاش
عــن ربـعـه الّـلـي يحـبّـونـه



فرد عليه بهذه القصيدة :



يا سيّدي عـاش راسـك عـاش
عسَـى أكـثـر الـنـاس يفـدونـه

شيخ(ن) لكل المراجـل حـاش
مـــا يـتـلـي الــنــاس يـتـلـونـه

صــدره بـحـب الـعـرب جـيّــاش
تـضــحــك ثــنــايــاه وعــيــونــه

ومخلاب صقر(ن) إلَى من ناش
يفـصـل عـــن الـهـامـه مُـتـونـه

يا سيّدي مـا أرغـب المطـراش
لـــــولا لـــــزوم(ن) تـعـرُفـونــه

أخــاف مــن هـرجـة الأوبـــاش
يـمـشــون بـالـكــذب يـرمـونــه

يـامــا تمـنّـيـت لــكــن مــــاش
أســيــر مــــع ظــلّــك ودونــــه

وما البس بـدال الحريـر خُيـاش
ومـن حـبّـه القـلـب مــا خـونـه

وإن سلم راسك برَدْت الجـاش
ومـا فـات يــا شـيـخ يــا هـونـه

عَزّ القصيد وزاعلتنـي حروفـه
من يوم غاب الّلي قصيدي مهاويه

غابت به الدنيا وخلّـت طيوفـه
عزّي لمن مثلي زمانـه يعاديـه

عقب الملاقىٰ بس بالقلب أشوفـه
وعقب المناجىٰ بس بالفكر أناجيه

كلامي وشوفي لغيـره حسوفـه
من غيره يْخاوي غريبي وأخاويه

يا لوعة المشتاق تصفـق كفوفـه
لين التفت ما شاف بالدّار غاليـه

كنّ العيون بكل شيـن محْذوفـه
والقلب كنّ جموع الأيام ترميـه

تسابقتني مـن زمانـي سيوفـه
تجرح مْرادي في حياتي وتدميـه

يا عونة الرحمن ويـن النكوفـه
لين انتحىٰ الخفّاق وش عاد يثنيه

ما رحت أدوّر عند خلّي مروفـه
ما يرحم إلاّ الله فلا شـك مغليـه

سافَرَت
خمسين عام من الزمان
هي عمر؟
والاّ على هامش زمان؟
هي حقيقة علم؟
والاّ هي سراب؟
هي مواجيع الدهر؟
والاّ حنان؟
في عجاج أيامها
دربي يذوب
تاهت الخطوه
وضيعت المكان
أنشغل
عن عمري بعمر آخرين
وانتبه
في لحظة غياب الأوان
مَرّت الدنيا
وأنا ارسم لوحتي
أرسم الفكره
على صهوة حصان
مرت الدنيا
وأنا شعري طفل
ما عصرت الروح
في حرف البيان
مرت الدنيا
وأنا حلمي سحاب
فوق سرج الريح
مطلوق العنان
مرت الدنيا
ولا ادري وش قضيت
من حوايج خاطري
ذكر وعيان
العمر ينقص
وحاجاتي تزود
عقب ما هي أربع(ن)
صارت ثمان
سَافَرت
كن الصحاري ما ازهرت
والمطر ما كنّه أنبت قحويان
سَافَرت
كن الليالي ما أقمرت
ما تقل
سامرت نجمات حسان
ماتقل
غنّت حمامه بالهديل
والهوا
ماهز عود الخيزران
سَافَرت
كن الحوادث ما جرت
وأصبحت سوالفي
كانت وكان
يا زماني
حاجتي في ركعتين
غير ربّ الوقت
مالي فيه شان